An tabbatar da mutuwar mutane 2 tare da jikkata wasu 77 sakamakon fashewar wani abu da ya faru a Ibadan babban birnin jihar Oyo da yammacin ranar Talata.
Gwamnan jihar Oyo, Seyi Makinde, wanda ya ziyarci wurin da fashewar ta faru, ya tabbatar da asarar rayuka.
Ya kuma ce fashewar ta afku a kan titin Adeyi, Bodija, ko da yake an ce ana ji motsin kasa a sassa da dama na birnin.
Mista Makinde ya ce binciken farko da jami’an tsaro suka gudanar ya nuna cewa, wasu masu hakar ma’adinai ba bisa ka’ida ba ne suka mamaye daya daga cikin gidaje a Bodija.
‘’Bincike na farko da jami’an tsaro suka gudanar ya nuna cewa masu hakar ma’adanai ba bisa ka’ida ba da suka mamaye daya daga cikin gidaje a Bodija sun ajiye bama-bamai a wurin wanda ya haddasa tashin bam. Ana ci gaba da gudanar da bincike. Duk wadanda aka samu da laifin haka za a gurfanar da su gaban kotu,” inji shi.
Gwamnan ya kuma bayyana cewa, ya bayar da umarnin cewa gwamnati ta biya kudaden jinyar duk wadanda fashewar ta shafa tare da samar da wurin kwana na wucin gadi ga wadanda fashewar ta rutsa da su gidajensu.
Gidaje da dama sun lalace sakamakon fashewar, wasu kilomita da dama daga inda fashewar ta faru.
“Mun ziyarci wurin da fashewar ta afku da misalin karfe 7.44 na yammacin jiya, 16 ga Janairu, 2024 a Bodija, Ibadan. Wannan mummunan al’amari ya yi sanadin mutuwa da raunata ga mazauna yankin tare da lalata dukiyoyi,” in ji Mista Makinde da yammacin ranar Talata. “Mun riga mun tura masu ba da amsa na farko da duk hukumomin da abin ya shafa a cikin jihar Oyo don gudanar da ayyukan bincike da ceto. Za a ci gaba da gudanar da ayyukan a cikin dare.
Torawa Yan'uwa Da Abokai
