“Kano gida ce, duk da cewa mai gabatarwa ya kira ni a matsayin bakar fata mafi arziki amma za ka iya kirana a matsayin dan Kano.”
Shugaban Kamfanin Dangote, Alhaji Aliko Dangote ya amince da wahalhalun da tattalin arzikin kasar nan ke ciki a halin yanzu, ya kuma yi alkawarin bayar da taimako domin rage radadin da mutanen Kano ke ciki ta hanyar wasu tsare-tsare na ci gaban bil’adama ga jihar. Dangote ya yi alkawarin ne a lokacin da ya ziyarci Gwamna Abba Yusuf a gidan gwamnati da ke Kano, a ranar Juma’a inda ya amince da cewa da kyar talaka zai iya tsira daga halin da ake ciki na hauhawar farashin kayayyaki a kasar nan.
“Kuna da hurumin a matsayin ku na mutane kuma na san da wuya kowane dan Adam ya tafa hannu biyu a yanzu. Domin yanzu, za ku zama hannun dama, mu kuma za mu zama hannun hagunku, tare za mu tafa.
“Don haka ku tabbata cewa za mu ba ku goyon baya tare da goyon bayan gwamnatinku kuma muna so mu gaya muku cewa za mu ci gaba da yi muku addu’a domin samun nasara saboda nasarar ku tamu ce. A hakuri da zuwa na a makare domin ya kamata a ce na zo nan a baya amma ina yawan tafiye-tafiye,” in ji Dangote.
“A ci gaba muna bukatar ganin yadda za mu bunkasa fannonin kiwon lafiya, ilimi, karfafawa gwamnati, ta yaya za mu taimaka wa gwamnati domin gwamnati ba za ta iya cimma bukatun al’umma ita kadai ba.
“Da farko muna taya ku murnar nasarar da kuka samu a kotun koli. Ina so in tabbatar muku da goyon bayanmu a tsawon mulkin ku, watakila ba shekaru hudu kawai ba amma shekaru takwas.
Dangote ya ci gaba da bayanin “Ina so na tabbatar muku da cewa za mu ci gaba da ba ku goyon baya ba don ni daga Kano nake ba amma don na san manufarku tana da kyau.
A nasa bangaren, Gwamna Yusuf ya nemi goyon bayan babban kamfanin man fetur don samar da wata tashar samar da wutar lantarki mai zaman kanta domin farfado da masana’antun da ke fama da rashin lafiya da kuma bunkasa tattalin arzikin jihar.
Hakazalika, Gwamnan ya shaida wa Dangote cewa Kano na bukatar a samar da asibitin sikila domin samar da magunguna kyauta ga marasa lafiya.
A yayin da yake yaba da irin nagartar Aliko Dangote a fannin ilimi da kiwon lafiya, musamman wajen kawar da cutar shan inna, gwamnan ya bayar da tabbacin cewa duk wani tallafi da aka bayar, za a yi amfani da shi ta hanyar da ta dace.
Domin samun sahihan labarai shiga WhatsApp group na labarangariyawaye
https://chat.whatsapp.com/DJEjSDGhJeX3PHx7XzXeHx
Torawa Yan'uwa Da Abokai
